Tiempo ‘e zampogne

L’avimmo visto, st’anno, n’ata vota,
‘o tiempo ‘e quanno sonano ‘e zzampogne:
ma comme vota ‘e pressa chesta rota
haie voglia d’’a fremmà cu ddiente e ogne.
Se sente addore ‘e ‘ncienzo mmiez’ â via,
sciùliano ‘a dint’’e spase ‘e capitune,
na vecchia murmurea n’Avummaria,
sparano quacche ttracco ruie guagliune;
ullero - ullero, abboffa ‘o zampugnaro,
ullero – ullero, canta ’a ciaramella,
mente cu ‘o ffuoco sotto, int’’a caurara,
se coceno ‘e ccacace cu ‘e nnucelle.
‘o pasticciero, dint’’a na vetrina,
mo spanne ‘e roccocò cu ‘e susamielle;
‘o verdummaro, ‘e canto ê mannarine,
ha fatto nu Vesuvio cu ‘e friarielle.
Pitta nu San Giuseppe ‘o pasturaro,
‘mperetta ‘o canteniero tutt’’o vino.
Na figliulella, doppo ‘o paro e ‘o sparo,
accatta, p’’o presebbio, nu Bammino.
Ntratanto, ‘o zampugnaro cagna casa,
e abboffa n’ata vota int’’a zampogna,
mente pe ssott’’e pporte sisca e trase
                                                                            na tramuntana ca ne zompa ll’ogne.
                                                                             Venuto è ‘o tiempo ca nascette Dio,
                                                                       pe chist’at’anno e pe tant’anne ancora,
                                                                        ma nun vola p’’o munno l’alleria
                                                                       saglieno ‘e vvoce ‘ncielo a d’’o Signore:
                                                                     «nu’ cchiù trivule e gguaie, arrassusia,
                                                                   u’ cchiù, nu’ cchiù, Signò, taluorno e gguerre!
                                                                      Tu ca si’ ‘o pate ‘e tutte, ca si’ Ddio,
                                                                        mànnace ‘a pace ncopp’a chesta terra».

               Carlo Avvisati, giornalista e scrittore si occupa di cultura napoletana, poesia, archeologia e teatro.                                                                        Scrive per il Mattino, il Giornale dell'Arte, Panorama.